1. البس ملابس مريحة وما تضغط على جسمك أو تشتت انتباهك أو تخليك مو مرتاح أثناء مدة الجلسة.

2. تأكد أنك في مكان آمن ما يسمعك أحد علشان تقدر تاخذ راحتك بالكلام ولا تشفّر مشاعرك.

3. تأكد أنك تاكل وجبة قبل الجلسة علشان ما يتشتت تفكيرك من الجوع وخلي كوب ماي موجود معك علشان تروي عطشك بين الكلام.

4. تذكّر أن البكاء في الجلسات العلاجية شيء طبيعي فتأكد أن معك علبة مناديل قريبة.

5. لا تتردد أنك تقول للاستشاري لو كنت بردان في مكتبه أو أن الإضاءة مزعجتك. ولو كانت الجلسة أون لاين تأكد أنك مرتاح قبل بدئها.

6. تذكر أنك الاستشاري ما راح يحكم عليك ولا يقيمك ولا يحسسك بالذنب فلا تنحرج تتكلّم وتعبّر عن أي شي يخطر في بالك.

7. لو ما عرفت تعبّر، ممكن يسألك الاستشاري أسئلة تساعدك تسرد أفكارك بشكل أسهل. وبالتالي يمكن تنصدم قد أيش سرد الكلام والمشاعر راح يكون سهل عليك.

8. لا تخجل أنك تقول للاستشاري لو أسلوبه ما ريّحك. الاستشاري الزين ما راح ياخذها بطريقة غلط وبالعكس راح يسوي اللي يقدر عليه علشان يتأكد أنك مرتاح معاه.

9. ممكن تحس بالإحباط لما ينتهي وقت الجلسة وأنت في نص الكلام أو لسه عندك مواضيع تبي تتكلم عنها. بس تذكّر أن العلاج النفسي رحلة كاملة ولا يتم من خلال جلسة وحدة. خلي عندك مدونة على الجوال تكتب فيها المواضيع والأشياء تبي تتذكرها للجلسة الجاية.